Sugidanun: Sa Ambahanun Gid Lang

Natung-an kang kahipus sanday Eddie kag Mike. Bisan ang mga pader kag pasilyo kang dormitoryo nagaparapanilag sa kada igut kag lagtik nga andang mabati-an sa mga kuwarto. Disyembre run, ugaring may kaudluy ang paghuyup kang hangin.  Sa anang kuwarto, indi run sarang maisip ni Mike ang anang pagpamaypay, kag nayukut run ang folder nga anang ginakuyab.  Kapira run tana nagabarabaliswa.  Alas dose run.  Ginapamangkot na ang anang kaugalingun kon ano ayhan ang ginaobra kang sara sa Room 303.  Darwahanun lang nga daan sanda sa bilog nga fourth floor.

Christmas vacation run, ugarin may OJT pa tana sa BPI.  December 24  sa rum-an kag kinanlan na  gid nga makauli sa Guimaras.  Nahadluk tana nga mag-isarahanun sa dorm.  Ginapirit na nga pirungun ang anang mga mata. Ginaagaw kang sangka handurawan ang anang katurugon. Si Eddie.  Nagbungkaras si Mike. Mahinay na nga ginlili halin sa gawang ang kuwarto ni Eddie. Bukas ang suga sa Room 303. Ginturuk ni Mike ang orasan.  Kinse minutos bag-o mag-ala una.  Dayon tana naggwa sa anang kuwarto.  Ginbayaan run tana kang katuyuhon.  Nabatian kang mga pader ang tikang kang tsinelas ni Mike paagto sa purungkuan nga nahamtang sa punta kang pasilyo.  Sa pag-agi na sa Room 303, daw ginahaplos tana kang dapya nga amat-amat nga nagparanupsup sa anang kalawasan.

Nagpungko si Mike kag nagsandig sa pader.  Wara na ginpasiga ang suga kag ginpabay-an na ang anang kaugalingun nga lamunon tana kang kadulum sa anang pagpirung.  Mabati-an na ang anang pagginhawa.  Ang pagtukar kang sangka masubu nga ambahanun halin sa mga kuwarto.  Halin sa masanag nga kuwarto nga amat-amat nga nagbukas.  Nagliso si Mike.  Bukut run haron ang anang makita.  Mahinay dya nga nagaparapit kag nagpungko ingud kana.  Nag-isdug si Mike.  Natung-an sanda kang kahipus.  Wara it mga tinaga nga nagbuhi sa andang mga baba.

Ang ambahanun gid lang.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s